|
6-2-2012
National Communal Harmony Award, 2011 dawng turin
Mizoram atangin Khamliana leh Odisha atangin
Md.Abdul Bari te chu thlan an ni. He chawimawina
dawng tur hian jury siam a ni a hei hi India Vice
President Hamid Ansari hova thukhawm a ni. Kumin a
National Communal Harmony dawng tur hian
organisation thlan an awm lo a ni.
Khamliana kum 56-a upa hi Mizoram Youth Club
President leh dintu a ni a. Kum 1990 khan Mizoram
Youth Club hi a din a ni. He club hian khawtlang tan
theihtawpin rawng a bawla, India ram inpumkhatna
atan Mizoram chhungah nasa takin tan an la a ni.
Khamliana hian a theihtawpin remna leh muanna
Mizorama neih anih theih nan hma a la a, India ram
zau zawka Mizo hnam ten chanvo an neih theihnan hma
a la bawk a ni. Musical concert, essay competition
leh cultural exchange programme thahnem tak Mizoram
Youth Club hmingin alo buatsaih tawh a ni. Kum 2000
khan Army campus ah civil mi leh sipaite inlaichinna
tih thatna turin a theihtawp a lo chhuah tawh a ni.
Nehru Yuva Kendra hnuaiah ram inpumkhatnan programme
hrang hrang ah te telin amah ngei pawh hian alo
buatsaih tawh a ni. Ama kaihhruaina hnuaiah Mizoram
Youth Club hian vawiin ni thlengin remna leh muanna
leh ram inpumkhatna atan hna a thawk mek a ni.
Adbdul Bari, kum 72 a upa hi Odisha a Bhadrak
district mi a ni a, khawtlang tana rawngbawltu anih
bakah mipui hruaitu challang tak a ni. Social
organisation hrang hrang 8 ah nihna a nei a,a theih
tawpin police leh sawrkar tan hna a thawk a, remna
leh muanna a awm theih nana hma la tu a ni. Kum 1991
a Bhadrak district a sakhuana avannga intihbuaina a
thlen tum khan mipui leh sawrkar palai a ni a. 1992
a babri Masjid tihchhiat anih tum leh 1993 Mumbai
bomb puak bakah Sabarmati Express 2002 a hal anih
tum te khan a theihtawpin hma a la ani. Sakhuana
avanga buaina lian tak Kandhamal district-a 2008-a a
chhuah tum khan hma a la bawk a, nikum khan a awmna
khua ah Id-Miladun-Nabi leh Ram Navami kut te chu
buaina awm lovin alo huaihawt bawk a ni. Abdul Bari
hian chawimawina hrang hrang alo dawng tawh a,
chungzingah chuan Nhadrak Rotary Club buatsaihin
Utkal Diwas Award 2002 khan a dawng a, 2005 khan
Muralidhar Shruti Sanshada, Bhadrak Award a dawng
bawk a ni.
National Communal Harmony Award hi kum 1996 atang
khan sem tan a ni a. Sawrkar Laipui hnuaia National
Foundation for Communal (NFCH) buatsaih a ni. He
lawman hian citation bakah Rs 2 lakh a kengtel dawn
a ni.
PIB, Aizawl |
