Forest Rights Act

Ministry of Tribal Affairs-in a bawhzui mek The Scheduled Tribes and Other Traditional Forest Dwellers (Recognition of Forest Rights) Act, 2006 hnuaiah hian forest rights hman leh pawm chungchang te, ramngawa cheng Scheduled Tribes leh hman lai ata tawh ramngawa chenga eizawng, chhuan tam tak lo khawsa tawh, an dinhmun leh eng zat nge an nih chhinchhiah mai theih lohte dap chhuah hna bawhzuite pawh a tel.
Scheduled Tribes hnam zinga ramngawa cheng hnawhchhuah an nih thu State/UT sorkar atanga report dawn a la awm lova. Scheduled Tribes and Other Traditional Forest Dwellers Act, 2006 section 4(5) chuan hman lai ata ramngawa chenga ei lo zawng tawh thinte finfiah a, chhuichianna hna kal mek tihfel a nih hma chuan ramngawa cheng tumah hnawhchhuah loh tur tih thu hi a lo pawm tawh tih a sawi lang bawk.


Scheduled Tribes and Other Traditional Forest Dwellers (Recognition of forest rights) Act ziarang tlangpui:
 

• He Act hian forest rights pawmin a kawl a, ramngawa chenga eizawng Scheduled Tribes leh hman lai atanga ramngaw lo khawsa tawh, thlahtute atanga ramngawa awmhmun lo khuar tawh, mahse, an rights chhinchhiahna awm lote harsatna a ching fel ang. Hman lai ata tawh ramngawa cheng ST-te laka rorelna dik lo awm thinte chu a thiat vek ang.
• He Act hian ni 13.12.2005 atanga chhiar leta chhuan thum zet ramngawa khawsa/lo cheng tawhte tan forest rights a pe ang a, an dam khawchhuah nan leh a nun khaw chhuah nana ramngaw lo hmang tawhte chu ramngaw neitua chhiar theihna tur dan a siam a, chhuan khat chhung rei zawng chhiar nan kum 25 a hmang ang.
• Act hnuaia forest rights pawm leh hman tan hun atan ni 13.12.2005 a pawm ang.
• Act hian forest rights chhunga ram pawm chin zau zawng mumal taka siamin hectare 4 aia zau luahtute chu forest rights a pe thei lo vang.
• Act hnuaiah hian National Parks leh Sanctuaries-te tan rights a siam ang a, a tul dan angin 'critical wildlife habitat' tiin a hming a vuah ang.
• Act hnuaiah hian ramngawa chen leh taneihna chanvo siam a ni ang a, ST hnam zinga mi emaw, hman lai ata tawh ramngawa chengten eizawnna leh intunnun nana mimal leh a pawl anga ramngaw an hman theihna dan a ruahman bawk.
• Act hian ramngaw atanga thil lak tur khawnkhawm, hman tangkai leh hralh thlengin thingtlang ramri chhung leh pawnah neitu nihna chanvo a siam ang. He Act hian 'minor forest produce' tihah hian tualto thlai chi hrang hrang, thingzai tur lam chi ni lo - mau te, thang lam chi te, thingbul te, rua te, tussar te, cocoons te, khawizu te, thalhrit te, khawihnun te, panhnah leh hnah ei chi te, damdawi lam thlai leh hlo te, thingzung te, thingzik angte a telh vek a ni.
• He Act hian chhawmdawlna dan chi hrang hrang duangin ni 13.12.2005 hma lama tribal leh ramngawa hman lai ata lo cheng tawhte dan lova hnawhchhuah emaw, lak chhuaha sawn thuah anmahni chhawmdawlna leh chenna tur hmun a ngaihtuah sak ang.
• He Act hnuaia rights inpekte hi inrochun theih a ni ang a, mahse, duh ang anga inpekchhawn erawh a theih lo vang a, nupui pasal nei an nih chuan an nupui leh an pasalte hminga registered a ni ang a, chhungkaw pa ber pakhat chauh awmna a nih chuan pa ber hminga registered a ni ang a, rochuntu tur a nei lo a nih chuan inrochunna thil chu a laina hnai ber hnenah pek chhawn theih a ni ang.
• Act hian ramngawa cheng tribal leh hman lai ata lo khawsa tawhte an eizawnna hmun ramngaw atanga um chhuah emaw sawn chhuah emaw chu anmahni enfiah leh finfiahna hna zawh fel a nih hma chuan a remti lo vang.
• He Act hnuaiah hian Gram Sabha chu hnam puala forest rights pek emaw, ST leh hman lai ata ramngawa lo khawsa tawhte rights pek thuah a huam chin rei zawng emaw, a pek dan hmang emawa thuneitu sang berah a dah bawk.
  He Act avanga hamthatna awm theite chu :
• He Act hian ramngawa cheng tribal leh hman lai ata lo cheng tawhten ei hmuhna leh eizawnna atan an hman ramngaw, an nunkhawchhuahna tur leh an chenna atana an hman thinah rights an neih theihna tur a duang a ni.
• Heng mite hian ramngaw atanga thil thar leh lakchhuah neih, hman leh hralh thlengin thuneihna an nei ang.
• An awmna ramngaw atanga hnawhchhuah leh lakchhuah tuma vauna an tawk lo vang
• Ram neitu nihna an chan chian hunah chuan Sorkar scheme hrang hranga hamthatnate an dawng ve ang
• Tribal chengte leh ramngawa hun rei tak lo khawsa tawhte chen hun rei zawng leh an khawsak dan tur ngaihtuah thua thuneihna Gram Sabha kuta pek a nih rualin henga chengte hian PESA Act, 1996 zulzuiin ramngaw hausakna enkawla humhalh theihna dan an nei tel bawk ang.
• Tribal leh hman lai atan ramngawa chengte forest rights pawmsak leh pek an nihnaah hian ramngaw leh a chhunga thil hlu humhalh, venhim leh ramsate inthlahpunna kawnga mawhphurhna chanvo an kutah a awm nghal ang.
• He Act hnuaiah hian nupa hminga ramngaw chhunga hmun pek thuah chanvo inang tlang a pe dawn a, chhungkaw pa mal a nih pawhin neih chin a nei ve ang a, hei hian ramngawa cheng hmeichhe tan pawh hamthatna chanvo a pe ve dawn a ni.
   

PIB, Aizawl