|
Ni 25.11.2011 khan Sorkar laipui, Assam sorkar
leh United People’s Democratic Solidarity(UPDS) te
chuan Union Home Minister Pu P.Chidambaram leh Assam
Chief Minister Pu Tarun Gogoi te hmuh laiin inremna
(Memorandum of Settlement) an ziak a. Union Home
Minister chuan he MoS hian Assam state chhunga Karbi
Anglong Autonomous Council tihchakna tur te, helai
biala zirna leh ei leh bar lama chak taka hmasawnna
tur te a keng tel a ni, a ti a. Sorkar chuan eng
pawl nen pawh inbiakrem a duh reng tih sawiin,
tharum thawhna tibova, India ram danpui chhunga
inchinfel zel hi a tha ber a ni, a ti bawk.
Home Minister P.Chidambaram chuan UPDS in hunk al tawha tharum an lo
thawh thin chu Karbi Anglong District hnufualzia
sorkarin a hriat chian theihna tura an tih mai a ni
tih sawi langin, tharum thawhna eng emaw zat an neih
hnuah kum 2002 August thla atang khuan UPDS chuan
tharum thawh bansana inbiakrem lam a hawi tan a,
India Danpui hnuaia inbiakrem a duh takzet tih a
lantir ta a ni, a ti.
Inremna kawnga chak zawka hmalak a nih theih nan
Sorkar laipui chuan UPDS te lungawi lohna ngaithlaa
inremsiamna kawng zawnpui turin kum 2009 November
thla khan Shri P.C.Haldar chu Sawrkar laipui aiawh/Interlocutor
atan a ruat a. Vawi eng emaw zat an inbiak hnuah
inremna awm theih nana kawng zawngtu – Ministry of
Home Affairs, Assam sawrkar leh UPDS aiawhte chuan
inremna (tripartite agreement) an siam thei ta a.
Mos chuan hengte hi a huam a ni :-
• India danpui Article 371B tlawh chhanin Assam Legislative Assembly
din a ni ang.
Karbi Anglong-a Council neih mek chu Karbi Anglong Autonomous
Territorial Council (KAATC) tiin a hming thlak a ni.
Council-a seat awm zat 30 ni thin chu 50-ah tihpun a
ni a, heng zinga seat 6 chu Governor ruat tur a ni
a, a hma lam chuan governor-in seat 4 a ruat thin.
Seat awm zat tihpunna chu kum 2016-17 Council
inthlanah emaw, a hmaa mid-term poll a awm emaw
chuan a hmasa zawk atanga hman tur a ni ang. Village
Council siam dan leh inthlanna pawh inthlandan phung
pangngai thei ang bera kalpui tur a ni. Assam State
sawrkar chuan Council hnenah Legislative leh
Executive Power pawh a tul angin a hlan ang a. State
Finance Commission dinin, hnathawh tur azirin sum
tam tham sen ngai pawh nise Council hnenah sum a
hlan thin ang. Sum hman danah kaihhruaina awmsa chu
khauh taka kalpuiin account zawng zawng uluk taka
audit tur a ni.
Vantlang nun leh ei leh bar lama hmasawnna te, zirna
leh hriselna bakah hnam nunphung leh zia chawikanna
atan theihtawpa hmalak a ni ang. KAATC chuan Plan
Fund bakah Special Economic package atan kumtin
cheng vaibelchhe 70 zelin cheng vaibelchhe 350
thleng an dawng ang a, heng sum hi hmasawnna hna
thlan bik thawhna atan hman tur a ni. Karbi Anglo
Dist. Chhunga inkalpawhna kawngpui, tui thianghlim
in tur leh power supply lama hmalak mek chu
tihhmasawn a ni ang.
KAATC huamchhung hmasawnna atana DPR etc. siam nan one-time grant pek a
ni ang. UPDS cadre te intunnunna ngaihtuah a ni ang
a; thubuai neite pawh thubuai hnuhkir dan kalphung
pangngaiin a tahtawla a mal mala hnuhkir a ni ang.
MoS tipuitling turin hma lak nghal a ni ang a, MoS tihpuitlin dan
dinhmun chu a thlir ho thin a ni bawk ang.
****************
PIB, Aizawl |
